Isa 23 | NdeIBE | STEP | Isiqalekiso esimayelana leThire: Khalani lina mikhumbi yaseThashishi! Ngoba iThire selichithiwe lasala lingaselandlu kumbe indawo yokungenisa imikhumbi. Ilizwi selifikile kibo livela elizweni laseKhuphrosi.

Isaiah 23

Isiphrofetho ngeThire

1 Isiqalekiso esimayelana leThire: Khalani lina mikhumbi yaseThashishi! Ngoba iThire selichithiwe lasala lingaselandlu kumbe indawo yokungenisa imikhumbi. Ilizwi selifikile kibo livela elizweni laseKhuphrosi.

2 Thulani lina bantu basesihlengeni lani bathengi baseSidoni, asebanothiswa ngabahambi bolwandle.

3 Amabele aseShihori eza ephezu kwamanzi, isivuno saseNayili sasiyinzuzo yeThire, njalo yaba yindawo yezizwe yokuthengiselana.

4 Woba lenhloni wena Sidoni, lawe wena nqaba yasolwandle ngoba ulwandle selukhulumile lwathi: “Kangizange ngondle amadodana kumbe ngikhulise amadodakazi.”

5 Lapho ilizwi lifika eGibhithe bazakuba lusizi ngombiko ovela eThire.

6 Khuphukelani ngaseThashishi; khalani lina bantu basesihlengeni.

7 Leli yilo na idolobho lenu lentokozo, idolobho elidaladala, elinyawo zalo zalithatha ukuyalihlalisa emazweni akude?

8 Ngubani ocebe lokhu ngeThire, umethesi wemiqhele, abathengisi bayo bangamakhosana, abathengisi bayo badumile emhlabeni?

9 UJehova uSomandla wakuceba lokhu, ukwehlisa ukuzigqaja kwenkazimulo yonke lokuthobisa bonke abalodumo emhlabeni.

10 Lima insimu yakho malungana leNayili wena Ndodakazi yaseThashishi ngoba kawuselayo indawo yokungenisa imikhumbi.

11 UJehova useselulele isandla sakhe phezu kolwandle wenza imibuso yalo yanyikinyeka. Usekhuphe umlayo ngeFenikhe ukuba izinqaba zayo zidilizwe.

12 Wathi, “Akusekho ukuthokoza kwakho wena Ndodakazi eMsulwa yaseSidoni esichoboziwe! “Vuka ukhuphukele ngaseKhuphrosi; lakhona awuyikuthola ukuphumula.”

13 Khangela elizweni lamaKhaledi, abantu laba khathesi abangaselutho! Abase-Asiriya sebelenze laba yindawo yezidalwa zasenkangala; bakhe imiphotshongo yabo yokuvimbezela, bazibhidlizile izinqaba zalo balenza laba lunxiwa.

14 Khalani lina mikhumbi yaseThashishi, inqaba yenu idiliziwe!

15 Ngalesosikhathi iThire izakhohlakala okweminyaka engamatshumi ayisikhombisa, ibanga lokuphila kwenkosi. Kodwa ekupheleni kwaleyominyaka engamatshumi ayisikhombisa, eThire kuzakwenzakala okunjengokutshiwo yingoma yewule ukuthi:

16 “Thatha ichacho, uhambahambe phakathi kwedolobho wena wule elikhohlakeleyo. Litshaye kuhle ichacho, uhlabele izingoma ezinengi, ukuze ukhunjulwe.”

17 Ekupheleni kweminyaka engamatshumi ayisikhombisa uJehova uzakhumbula iThire. IThire lizabuyela ekuthengiseni kwalo njengewule, njalo lizabuyela emsebenzini walo wokuthengiselana lemibuso yonke esemhlabeni. 18 Inzuzo lemiholo yalo kuzakwahlukaniselwa uJehova; kakuyikulondolozwa loba kubuthelelwe. Inzuzo yalo izakuya kulabo abahlala loJehova ukuba babe lokudla okunengi lezigqoko ezinhle.